ಇನ್ನೊಂದು ಹುಟ್ಟುಹಬ್ಬ ನನ್ನ ಸಹಧರ್ಮಿಣಿಯದ್ದು. 19ವರ್ಷಗಳ ಕಾಲ ಅನವರತ ನನ್ನ ಕುಟುಂಬಕ್ಕೆ ಶ್ರೀಗಂಧದಂತೆ ತನ್ನನ್ನೇ ತೇಯ್ದು, ಏಳ್ಗೆ ಬಯಸುತ್ತಿರುವ ಸಹೃದಯಿಗೆ ಒಂದು ಪುಟ್ಟ ಉಡುಗೊರೆ
ಮನೆಯಲ್ಲಿಯೂ ನಾವಿಡುವ ಹೆಜ್ಜೆ ಹೆಜ್ಜೆಯಲ್ಲಿಯೂ ಸುಗಂಧ ಬೀರಲು,
ತನ್ನನ್ನೇ ತಾನು ಶ್ರೀ ಗಂಧದಂತೆ ತೇಯ್ದು, ನಮ್ಮಗಳ ಮೂಲಕ
ಜಗತ್ತಿಗೇ ಬೆಳಕು ಸುವಾಸನೆ ಬೀರುತಿಹ
ನಮ್ಮೆಲ್ಲರಿಗೆ ಉತ್ತಮ ಹೆಸರು ಬರುವಂತೆ ಮಾಡುತ್ತಿರುವ
ಮಕ್ಕಳ ಮಹಾತಾಯಿಯ ಹುಟ್ಟುಹಬ್ಬಕ್ಕೆ ನನ್ನ ಕಡೆಯಿಂದೊಂದು ಪುಟ್ಟ ಕಾಣಿಕೆ
ಬಾಳಲಿ ಬಂದಳು ಮಹಾಮಾಯೆ
ಸಿಲುಕಿಸಿದಳು ಕನಸಿನ ಲೋಕದಿ
ತೋರಿದಳು ಬಣ್ಣ ಬಣ್ಣದ ಕಾಮನಬಿಲ್ಲು
ಊದಿದಳು ನನ್ನ ಹೃದಯದಲಿ ಪುಗ್ಗ
ನನ್ನ ಪಗಡೆಯಾಟದಲಿ ಕಾಯಿಯಾಗಿ
ನಾನಾಡಿದ ಆಟಗಳಿಗೆ ಬಲಿಯಾಗಿ
ರೋಸದೇ ಸೀದದೇ ಕರಕಾಗದೇ
ಮೃದುವಾಗಿ ಹದವಾಗಿ ಬೇಯಿಸುತಿಹಳು
ಮುದ್ದಾದ ಕಂದಗಳ ಹೊತ್ತು ಹೆತ್ತು ಇತ್ತು
ತನು ಮನಗಳ ತಣಿಸಿದ ಮಕ್ಕಳ ತಾಯಿ
ಮನೆಯ ಸಿಂಗರಿಸಿ ಅಲಂಕರಿಸಿದ ಗೃಹಿಣಿ
ಚೊಕ್ಕವಾಗಿಸಿದ್ದು ಚಿಕ್ಕ ಪುಟ್ಟ ಭರಣಿ
ಕಂಡ ಕಾಣದ ದೇಗುಲಗಳ ಹೊಕ್ಕು
ಹೇಳದ ಕೇಳದ ದೇವರುಗಳ ಪೂಜಿಸಿದ
ಉಪವಾಸ ವ್ರತಗಳ ನಿತ್ಯವಾಗಿಸಿದ
ಮನೆಯ ಒಳಿತಿಗಾಗಿ ಶ್ರಮಿಸಿದ
ಮಕ್ಕಳಿಗೆ ಮಮತೆಯೂಡಿಸದ ತಾಯಿ
ಆಟ ಪಾಠಗಳ ಕಲಿಸಿದ ಗುರುವು
ಜೀವನದ ಹಾದಿಯ ತೋರಿದ ಮಾತೆ
ನನಗೂ ತೋರಿದಳು ಇವಳು ಮಹಾಮಾತೆ
ಜೀವ ಜ್ಯೋತಿ ಸಲಹಿದ ಹೃದಯಪ್ರಿಯೆ
ಇಂದು ಬಾಳಲಿ ಆಗಿಹಳು ಮಹಾತಾಯೆ
ಮಕ್ಕಳಾದಿಯಾಗಿ ಪ್ರೀತಿಸುವ ಜೀವ ಒರತೆ
ಎಂದೂ ನಂದದಿರಲಿ ವಂಶದ ಹಣತೆ
ಆ ದೇವಿಯ ಆರತಿಯೊಂದಿಗೆ ಹಬ್ಬದಾಚರಣೆ –
ಜಗಜನನೀ ಜಗಜಾನೀ ಮಹಿಷಾಸುರಮರ್ದಿನೀ
ಜಗಜನನೀ ಜಗಜಾನೀ ಮಹಿಷಾಸುರಮರ್ಧಿನೀ
ಜ್ವಾಲಾಮುಖೀ ಚಂಡೀ ಅಮರಪದದಾನೀ
ಜ್ವಾಲಾಮುಖೀ ಚಂಡೀ ಅಮರಪದದಾನೀ
ದಯಾನೀ ಭವಾನೀ ಮಹಾವಾಕ್ ವಾಣೀ
ಸುರನರಮುನಿಜನಮಾನೀ ಸಕಲ ಬುಧಜ್ಞಾನೀ
ದಯಾನೀ ಭವಾನೀ ದಯಾನೀ ಭವಾನೀ
ಶ್ರೀನಿವಾಸ 
4 replies on “ಸಹಧರ್ಮಿಣಿಗೊಂದು ಪುಟ್ಟ ಕಾಣಿಕೆ”
ತವಿಶ್ರೀಗಳೆ,
ನೀವು ಬರೆದ ಕವನ ಓದಿದ ಮೇಲೆ ಖಂಡಿತವಾಗಿಯೂ ನಿಮ್ಮ ಮೇಲೆ ನಿಮ್ಮ ಶ್ರೀಮತಿಯವರಿಗೆ ೧-೨ ಕೆ.ಜಿಯಾದರೂ ಪ್ರೀತಿ ಜಾಸ್ತಿಯಾಗಿರುತ್ತೆ !
ಮಾಯಮಾತೆ ಅಂತಾ ಕರೆದಾಗ ಯಾಕೋ ಪರಮಹಂಸರ ನೆನಪಾಯಿತು…
ನಿಮ್ಮ ಪತ್ನಿಯವರಿಗೆ, ನಮ್ಮ ಕಡೆಯಿಂದ ಜನ್ಮ ದಿನದ ಶುಭಾಶಯಗಳನ್ನು ತಿಳಿಸಿ..
ತವಿಶ್ರೀ,
ಎಶ್ಟೊ ದಿವಸದ ನಂತರ ನಿಮ್ಮ ಕವನ ಓದ್ತ ಇದ್ದಿನಿ. ಒಳ್ಳೆ ಉಡುಗೊರೆ ನಿಮ್ಮ ಶ್ರೀಮತಿಯವರಿಗೆ.
ನನ್ನ ಕಡೆ ಇಂದಲು, ಜನುಮ ದಿನದ ಶುಭಾಶಯ ತಿಳಿಸಿಬಿಡಿ.
ಇಂತಿ
ಭೂತ
ಶ್ರೀನಿವಾಸರೆ,
ನಿಮ್ಮ ಶ್ರೀಮತಿಯವರಿಗೆ ನಮ್ಮ ಶುಭಾಶಯ ತಿಳಿಸಿಬಿಡಿ.
ಮತ್ತು ಜನ್ಮ ದಿನಕ್ಕೆ ಮನೇಲಿ ಏನೇನೆಲ್ಲಾ ಮಾಡಿದ್ದಾರೋ…. ಅದನ್ನೆಲ್ಲಾ ಪ್ಯಾಕ್ ಮಾಡಿ ಕಳುಹಿಸಲು ತಿಳಿಸಿ. ಗಟ್ಟಿಯಾಗಿ ಪ್ಯಾಕ್ ಮಾಡಲು ಹೇಳಿ… ಇಲ್ಲವಾದರೆ, ದಾರಿಯಲ್ಲೆಲ್ಲಾದರೂ ಕಳೆದು ಹೋದೀತು….
ಶಿವಶಂಕರ, ರಮೇಶ ಮತ್ತು ಅನ್ವೇಷಿಗಳಿಗೆ ವಂದನೆಗಳು. ಪ್ಯಾಕ್ ಮಾಡಿ ಕಳುಹಿಸಿರುವೆ. ಮೇಲೆ ಸ್ವಲ್ಪ ಡಿಡಿಟಿ ಹಾಕಿರುವೆ. ಇಲ್ಲದಿದ್ದರೆ ಪೋಸ್ಟ್ ಮ್ಯಾನ್ ಗೆ ಅನುಮಾನ ಬಂದು ತಿಂದಾನು ಅಂತ.